തിരുവനന്തപുരം: കേരള യൂണിവേഴ്സിറ്റിയ്ക്ക് കീഴിലെ ക്യാമ്പസുകളിൽ നടന്ന കോളേജ് യൂണിയൻ തിരഞ്ഞെടുപ്പിൽ എഐഎസ്എഫിന് ഉജ്വല വിജയം. അടൂർ ഐഎച്ച്ആർഡി കോളേജിൽ മുഴുവൻ സീറ്റിലും വിജയിച്ച് യൂണിയൻസ്വന്തമാക്കാൻ എഐഎസ്എഫിനായി. തിരുവനന്തപുരം തുമ്പ സെന്റ് സേവിയേഴ്സ് കോളേജിൽ മാഗസിൻ എഡിറ്ററായി ശരത്തും കാവിയാട് കോളേജിൽ ചെയർപേഴ്സണായി ആദിത്യ ജോസും വിജയിച്ചു.
കൊട്ടാരക്കര എസ്ഡി കോളേജിൽ തേർഡ് ഇയർ പ്രതിനിധിയും തോന്നയ്ക്കൽ എ ജെ കോളേജിൽ സെക്കന്റ് പിജി പ്രതിനിധിയും വിജയിച്ചു. കൊല്ലം എസ് എൻ കോളേജിൽ 16 ഉം പുനലൂർ എസ് എൻ കോളേജിൽ 15 ഉം വർക്കല എസ് എൻ കോളേജിൽ 12 ഉം എഐഎസ്എഫ് സ്ഥാനാർത്ഥികൾ ക്ലാസ് പ്രതിനിധികളായി തെരഞ്ഞെടുക്കപ്പെട്ടു. 27 ക്യാമ്പസുകളിലായി നിരവധി ക്ലാസ് പ്രതിനിധികളാണ് വിജയം സ്വന്തമാക്കിയത്. വിജയികളെയും എഐഎസ്എഫിന് വോട്ട് രേഖപ്പെടുത്തിയ വിദ്യാർത്ഥികളെയും സംസ്ഥാന പ്രസിഡന്റ് ആർ എസ് രാഹുൽ രാജും സെക്രട്ടറി പി കബീറും അഭിവാദ്യമർപ്പിച്ചു.
