വൈക്കം: എഐവൈഎഫിന്റെ നേതൃത്വത്തിൽ നടക്കുന്ന സി കെ ചന്ദ്രപ്പന്‍ സ്മാരക അഖിലകേരള വോളിബോള്‍ ടൂര്‍ണമെന്റിനു ഇന്ന് തുടക്കം. എഐവൈഎഫ് തലയാഴം നോർത്ത് മേഖലാ കമ്മിറ്റിയുടെ ആഭിമുഖ്യത്തിൽ ഇത് മൂന്നാം വട്ടമാണ് അഖിലകേരള വോളിബോൾ ടൂർണമെന്റ് സംഘടിപ്പിക്കുന്നത്. കായികലഹരി യുവതയുടെ ഭാവിയ്ക്ക് എന്ന മുദ്രാവാക്യം ഉയര്‍ത്തി സംഘടിപ്പിക്കുന്ന ടൂര്‍ണമെന്റ് യുവതലമുറയെ മദ്യ-മയക്കുമരുന്ന് ലഹരിയില്‍നിന്നും കായിക ലഹരിയിലേക്ക് ആകര്‍ഷിക്കാന്‍ ലക്ഷ്യമിടാണ് ടൂർണമെന്റ് സംഘടിപ്പിക്കുക.
16 മുതല്‍ 19 വരെ തോട്ടകം വളഞ്ഞമ്പലം എം പി സാനു ഫ്‌ളഡ് ലിറ്റ് സ്റ്റേഡിയത്തില്‍ വച്ചുസംഘടിപ്പിക്കുന്ന കായിക മാമാങ്കത്തിൽ കേരളത്തിന്റെ വിവിധ ഇടങ്ങളിൽ നിന്നുള്ള ടീമുകൾ പങ്കെടുക്കും.
സെന്റ് തോമസ് കോളേജ് പാലാ, സെന്റ് സ്റ്റീഫന്‍സ് കോളേജ് പത്തനാപുരം, ബിപിസി കോളേജ് പിറവം, സെന്റ് ജോര്‍ജ് കോളേജ് അരുവിത്തറ, സിഎംഎസ് കോളേജ് കോട്ടയം, ഡിസ്റ്റ് കോളേജ് അങ്കമാലി, ക്രൈസ്റ്റ് കോളേജ് ഇരിഞ്ഞാലക്കുട, സെന്റ് പീറ്റേഴ്‌സ് കോളേജ് കോലഞ്ചേരി എന്നീ എട്ടു പുരുഷ ടീമുകളാണ് മത്സരിക്കുന്നത്. അസംപ്ഷന്‍ കോളേജ് ചങ്ങനാശ്ശേരി, അല്‍ഫോന്‍സ കോളേജ് പാലാ എന്നീ വനിതാ ടീമുകളുടെ പ്രദര്‍ശന മത്സരവും ടൂർണമെന്റിൽ അരങ്ങേറും.
