നവംബർ 20 ലഹരിമാഫിയയുടെ കൊടിയമർദ്ദനം ഏറ്റുവാങ്ങി കൊല്ലപ്പെട്ട സഖാവ് ഇ എച്ച് അൻസിലിന്റെ 9-ാo രക്തസാക്ഷി ദിനം. തൃശ്ശൂർ ജില്ലയിലെ മണലൂർ മണ്ഡലത്തിലെ എഐവൈഎഫ് ചെട്ടിക്കാട് യൂണിറ്റ് സെക്രട്ടറിയായും വാടാനപ്പിള്ളി മേഖല ജോയിന്റ് സെക്രട്ടറിയുമായും ചുമതല വഹിച്ചുകൊണ്ടിരിക്കെ പ്രദേശത്തെ ലഹരിമാഫിയയുടെ ആക്രമണത്തിലാണ് അൻസിലിനു ജീവൻ നഷ്ടമായത്. ലഹരിക്കെതിരെ പോരാടാൻ എന്നും മുൻപന്തിയിൽ തന്നെയുണ്ടായിരുന്ന അൻസിൽ എന്നും ഈ മഫിയയുടെ കണ്ണിലെ കരട് തന്നെയായിരുന്നു. 2014 നവംബർ 18ന് തൃപ്രയാർ ഏകാദശി കഴിഞ്ഞു മടങ്ങി വരുന്ന വഴിയിൽ, നാട്ടികയിൽ വെച്ച് കഞ്ചാവ് മയക്കുമരുന്ന് ഗുണ്ടാസംഘത്തിന്റെ അക്രമണത്തിൽ ഗുരുതരമായ പരുക്കേറ്റ അൻസിൽ പിന്നീട് നവംബർ 20 ന് ആശുപത്രിയിൽ വച്ച് മരണപ്പെടുകയായിരുന്നു.
ജീവകാരുണ്യ പ്രവർത്തനങ്ങൾക്കൊപ്പം, ലഹരി വിരുദ്ധ പ്രവർത്തനങ്ങളുമായി ജനങ്ങൾക്കിടയിൽ പ്രവർത്തനങ്ങൾ കാഴ്ച്ചവെച്ച ഈ ചെറുപ്പക്കാരന്റെ നഷ്ടം കുടുംബത്തിനും ആ പ്രദേശത്തിനും സംഘടനയ്ക്കും നികത്താനാവാത്തതായിരുന്നു. കഞ്ചാവ് ലഹരി വിൽപ്പനയും ഉപയോഗങ്ങളും തെറ്റാണെന്നറിഞ്ഞിട്ടും അതിന്റെ മായാ വലയത്തിൽ യുവതലമുറയിൽപ്പെടു പോകുന്ന വാർത്തകൾ സമീപകാലത്തു ഏറി വരുകയാണ്. ലഹരി ഉപയോഗം മനുഷ്യന്റെ കർമ്മശേഷിയെ നിർജ്ജീവവും അലസവുമാക്കി മാറ്റുന്ന പ്രക്രിയയാണെന്ന് എല്ലാവരും മനസിലാക്കണം. അതിന്റെ ഉപയോഗങ്ങളിൽ യുവാക്കൾ ഉൾപ്പെടാൻ നമ്മൾ ഒരിക്കലും അനുവദിച്ചു കൂടാ.
സഖാവ് അൻസിൽ ഉയർത്തിപ്പിടിച്ച ഈ മഹത്തായ ആശയം വരുംതലമുറക്ക് കൂടി കൈമാറാൻ നമ്മൾ പ്രതിജ്ഞാബദ്ധരാണ്. നമ്മളിലൂടെ ഈ ആശയം കൈമാറുമ്പോൾ ഓരോ എഐവൈഎഫ് കാരനും സ്വയം സഖാവ് അൻസിലായി മാറുന്നു. അതിലൂടെ സഖാവ് അൻസിൽ നമ്മളിലൂടെ ജീവിക്കുന്നു.
അൻസിലിന്റെ ജ്വലിക്കുന്ന ഓർമ്മകൾക്ക് മുൻപിൽ ഒരായിരം രക്തപുഷ്പങ്ങൾ അർപ്പിക്കുന്നു…
