വിജയവാഡ: എഐവൈഎഫ് സംസ്ഥാന സെക്രട്ടറി ടി ടി ജിസ്മോൻ സിപിഐ ദേശീയ കൗൺസിലിലേക്ക്. വിജയവാഡയിൽ നടക്കുന്ന 24ാം പാർട്ടി കോൺഗ്രസിലാണ് അദ്ദേഹത്തെ ദേശീയ കൗൺസിലിലേക്ക് തെരഞ്ഞെടുത്തത്. കേരളത്തിൽ നിന്ന് മന്ത്രിമാർ ഉൾപ്പടെ ഏഴു പുതുമുഖങ്ങളാണ് ദേശീയ കൗൺസിലിൽ അംഗങ്ങളായിരിക്കുന്നത്. മന്ത്രിമാരായ കെ രാജൻ, ജി ആർ അനിൽ, പി പ്രസാദ്, ജെ ചിഞ്ചുറാണി ഡെപ്യൂടി സ്പീക്കർ ചിറ്റയം ഗോപകുമാർ, രാജാജി മത്യു തോമസ് എന്നിവരാണ് ദേശീയ കൗൺസിലിലേക്ക് തെരഞ്ഞെടുത്ത മറ്റു അംഗങ്ങൾ. സത്യൻ മൊകേരി കൺട്രോൾ കമ്മിഷൻ അംഗമാകും. ആറ് പേരാണ് ദേശീയ കൗൺസിലിൽ നിന്ന് ഒഴിയുന്നത്.
കണ്ണൂരിൽ നടന്ന എഐവൈഎഫിന്റെ 21-ാം സംസ്ഥാന സമ്മേളനത്തിലാണ് ടിടി ജിസ്മോനെ സംസ്ഥാന സെക്രട്ടറിയായി തെരഞ്ഞെടുത്തത്. സംസ്ഥാന യുവജന ക്ഷേമ ബോർഡ് അംഗം കൂടിയാണ് ടി ടി ജിസ്മോൻ.
അതേസമയം, അഞ്ചു ദിവസമായി നടന്നുവരുന്ന സിപിഐ 24 -ാം പാർട്ടി കോൺഗ്രസിന് ഇന്ന് സമാപനമാകും. ലക്ഷം പേരുടെ റാലിയോടെ 14 ന് ആരംഭിച്ച പാർട്ടി കോൺഗ്രസ് നിർണായക രാഷ്ട്രീയ തീരുമാനങ്ങളും പോരാട്ട് പ്രഖ്യാപനങ്ങളുമായാണ് സമാപിക്കുന്നത്. ഇന്നലെ ഉച്ചയോടെ പൊതുചർച്ച പൂർത്തിയാക്കി. തുടർന്ന് ജനറൽ സെക്രട്ടറി ഡി രാജ അവതരിപ്പിച്ച കര ടു രാഷ്ട്രീയ പ്രമേയം , കേന്ദ്ര സെക്രട്ടേറിയറ്റ് അംഗങ്ങളായ ഡോ. ബാൽ ചന്ദ്ര കാംഗോ അവതരിപ്പിച്ച രാഷ്ട്രീയ അവ ലോകന റിപ്പോർട്ട് , അതുൽ കുമാർ അഞ്ജാൻ അവതരിപ്പിച്ച സംഘടനാ റിപ്പോർട്ട് , പാർട്ടി പരിപാടി , ഭരണഘടന എന്നിവ സംബന്ധിച്ച് പ്രതിനിധികൾ നാലു കമ്മിഷനുകളായി തിരിഞ്ഞ് സമഗ്രമായ ചർച്ച നടത്തി.
