നാട്ടിക: “വീടൊരുക്കാം വയനാടിന് ” എന്ന മുദ്രാവാക്യത്തോടെ വയനാടിന് പത്ത് വീടുകൾ നിർമ്മിച്ചു നൽകുവാനുള്ള ധനസമാഹരണത്തിന് നാട്ടിക മണ്ഡലം കമ്മിറ്റിയുടെ നേതൃത്വത്തിൽ പെരിങ്ങോട്ടുകരയിൽ മുണ്ടക്കൈ നഗർ എന്ന് നാമകരണം ചെയ്ത് യൂത്ത് മാർക്കറ്റ് ആരംഭിച്ചു. റവന്യൂ വകുപ്പ് മന്ത്രി കെ രാജൻ പ്രവർത്തനോദ്ഘാടനം നിർവ്വഹിച്ചു. വയനാടിൻ്റെ ദു:ഖത്തിൽ പങ്കുചേർന്നും രക്ഷാ പ്രവർത്തനത്തിലും സന്നദ്ധ സേവനമുഖത്തും അണിനിരന്ന കേരളത്തിലെ യുവജനത ലോകത്തിന് മാതൃകയാണ് എന്ന് അദ്ദേഹം പറഞ്ഞു.
മുൻ കൃഷി വകുപ്പ് മന്ത്രി വി എസ് സുനിൽകുമാർ മുഖ്യാത്ഥിയായി.ഉദ്ഘാടന വേദിയിൽ വെച്ച് വി.എസ്.സുനിൽകുമാർ തൻ്റെ ഒരു മാസത്തെ പെൻഷൻ മുഖ്യമന്ത്രിയുടെ ദുരിതാശ്വാസ നിധിയിലേക്ക് കൈമാറി. നാട്ടിക എംഎൽഎ സി സി മുകുന്ദൻ, സിപിഐ സംസ്ഥാന കൗൺസിൽ അംഗം കെ പി സന്ദീപ്, ഷീന പറയങ്ങാട്ടിൽ, സിപിഐ നാട്ടിക മണ്ഡലം സെക്രട്ടറി സി ആർ മുരളീധരൻ തുടങ്ങിയവർ സംസാരിച്ചു.
എഐവൈഎഫ് ജില്ലാ സെക്രട്ടറി പ്രസാദ് പറേരി ആദ്യ വിൽപ്പനയുടെ ഉദ്ഘാടനം നിർവ്വഹിച്ചു. താന്ന്യം ഗ്രാമപഞ്ചായത്ത് പ്രസിഡന്റ് ശുഭ സുരേഷ് ആദ്യ വിൽപ്പനയിൽ പങ്കാളിയായി. ഒരാഴ്ചക്കാലമാണ് യൂത്ത് മാർക്കറ്റിൻ്റെ പ്രവർത്തനം. ഓരോ ദിവസവും ഓരോ മേഖല കമ്മിറ്റിയാണ് മാർക്കറ്റ് തുറന്ന് പ്രവർത്തിക്കുന്നത്. വിൽപ്പനയിൽ നിന്ന് ലഭിക്കുന്ന ലാഭവിഹിതം എഐവൈഎഫ് സംസ്ഥാന കമ്മിറ്റി നിർമ്മിക്കുന്ന പത്ത് വീടുകളുടെ നിർമ്മാണത്തിലേക്ക് നൽകും. എഐവൈഎഫ് മണ്ഡലം സെക്രട്ടറി വൈശാഖ് അന്തിക്കാട് സ്വാഗതവും,മണ്ഡലം പ്രസിഡന്റ് എം ജെ സജൽകുമാർ അധ്യക്ഷതയും വഹിച്ചു. മണ്ഡലം എക്സിക്യൂട്ടീവ് അംഗം സംഗീത മനോജ് നന്ദിയും പറഞ്ഞു.
