തൃശ്ശൂർ: ബിജെപി പ്രവർത്തകരുടെ ആക്രമണത്തിൽ എഐവൈഎഫ് പ്രവവർത്തകനു പരിക്ക്. എഐവൈഎഫ് പ്രവർത്തകനായ ശ്രീരാഗിനാണ് ബിജെപി പ്രവർത്തകർ മാരക ആയുധമുപയോഗിച്ച് കുത്തി പരിക്കേൽപ്പിച്ചത്. കണ്ടശ്ശാംകടവ് മാമ്പുള്ളിയിൽ ബിജെപി പ്രവർത്തകരുടെ മർദ്ദനത്തിൽ പരിക്കേറ്റ സിപിഐ(എം) പ്രവർത്തകരെ ആശുപത്രിയിൽ പ്രവേശിപ്പിക്കാൻ ശ്രമിക്കുന്നതിനിടെയാണ് എഐവൈഎഫ് പ്രവർത്തകനു കുത്തേറ്റത്. ശ്രീരാഗിന്റെ കഴുത്തിനു കുത്തേൽക്കുകയും താടിയെല്ല് ഒടിയുകയും ചെയ്തു. ശനിയാഴ്ച രാത്രിയാണ് പ്രദേശത്ത് സംഘർഷമുണ്ടായത്.
മാമ്പുള്ളിയിലെ ക്ഷേത്രോത്സവത്തോടനുബന്ധിച്ച് വെള്ളിയാഴ്ച ബിജെപി സിപിഐ(എം) പ്രവർത്തകർ തമ്മിൽ സംഘർഷം ഉണ്ടായിരുന്നു. ഇതിന്റെ തുടർച്ചയായാണ് ശനിയാഴ്ച രാത്രി സംഘർഷമുണ്ടായത്. വീട്ടുമുറ്റത്ത് ഫോണിൽ സംസാരിച്ചുനിന്നിരുന്ന സിപിഐ(എം) പ്രവർത്തകനായ രഘുവിനെ ബിജെപി പ്രവർത്തകർ ആക്രമിക്കുകയായിരുന്നു. ഓടിയെത്തിയ നവീനും രഘുവിന്റെ മകൻ കണ്ണനും മർദനമേറ്റു. സംഘർഷത്തിൽ പരിക്കേറ്റവരെ ആശുപത്രിയിലെത്തിക്കാൻ മറ്റൊരു സുഹൃത്ത് വിളിച്ച് പറഞ്ഞതനുസരിച്ചാണ് ശ്രീരാഗ് സ്വന്തം കാറുമായി സംഭവസ്ഥലത്തെത്തിയത്. ഇവരെ കയറ്റി ആശുപത്രിയിലേക്ക് പോകുന്നതിനിടെ ബിജെപി പ്രവർത്തകർ ശ്രീരാഗിനേ ആക്രമിക്കുകയായിരുന്നു. ആക്രമികൾ കാർ തകർത്തു.
