തിരുവനന്തപുരം: മതനിരപേക്ഷ ഇന്ത്യയ്ക്കായി ഒരുമിക്കാം തൊഴിലിന് വേണ്ടി പോരാടാം എന്ന മുദ്രാവാക്യമുയർത്തി എഐവൈഎഫിന്റെ നേതൃത്വത്തിൽ മതേതര സം​ഗമം സംഘടിപ്പിക്കുന്നു. സംസ്ഥാന വ്യാപകമായി ആ​ഗസ്റ്റ് 15 നു വിവിധ ജില്ലാ കേന്ദ്രങ്ങളിൽ വച്ചായിരിക്കും മതേതര സം​ഗമം നടത്തുക. വിവിധ മണ്ഡലങ്ങൾ കേന്ദ്രീകരിച്ച് വിളംബര റാലിയോടെയാവും പരിപാടികൾക്ക് തുടക്കമാവുക.

ഇടുക്കി ജില്ലാ കമ്മിറ്റിയുടെ നേതൃത്വത്തിൽ നടക്കുന്ന മതേതര സം​ഗമം എഐവൈഎഫ് ദേശീയ ജനറൽ സെക്രട്ടറി ആർ തിരുമലൈ രാമൻ ഉദ്ഘാടനം ചെയ്യും. തൃശൂർ ജില്ലാ കമ്മിറ്റിയുടെ ആഭിമുഖ്യത്തിൽ മണ്ണൂത്തിയിൽ വച്ച് നടക്കുന്ന പരിപാടി എഐവൈഎഫ് സംസ്ഥാന സെക്രട്ടറി ടി ടി ജിസ്മോൻ ഉദ്ഘാടനം നിർവഹിക്കും. പാലക്കാട് വടക്കഞ്ചേരിയിൽ നടക്കുന്ന സം​ഗമം സിപിഐ ദേശീയ സെക്രട്ടേറിയേറ്റ് അം​ഗം ബിനോയ് വിശ്വം എംപി ഉദ്ഘാടനം ചെയ്യും. പത്തനംതിട്ട അടൂരിൽ നടക്കുന്ന സം​ഗമം കൃഷിമന്ത്രി പി പ്രസാദ് ഉദ്ഘാടനം ചെയ്യും.

ആലപ്പുഴ ജില്ലാ കമ്മിറ്റിയുടെ ആഭിമുഖ്യത്തിൽ നടക്കുന്ന മതേതര സം​ഗമം പന്ന്യൻ രവീന്ദ്രൻ ഉദ്ഘാടനം നിർവഹിക്കും. മലപ്പുറം ജില്ലാ കമ്മിറ്റിയുടെ ആഭിമുഖ്യത്തിൽ പെരിന്തൽമണ്ണയിൽ വച്ച് നടക്കുന്ന പരിപാടി പി സന്തോഷ്കുമാർ എംപി ഉദ്ഘാടനം നിർവഹിക്കും. കണ്ണൂർ തളിപ്പറമ്പിൽ നടക്കുന്ന സം​ഗമം സിപിഐ അസിസ്റ്റന്റ് സെക്രട്ടറി സത്യൻ മൊകേരി ഉദ്ഘാടനം നിർവഹിക്കും.