തിരുവനന്തപുരം: സിപിഐ 24 -ാം പാർട്ടി കോൺഗ്രസ് തീരുമാനങ്ങളുടെ റിപ്പോർട്ടിങ്ങിനായി അഞ്ച് മേഖലാ യോഗങ്ങൾ നടത്തുന്നതിന് പാർട്ടി സംസ്ഥാന കൗൺസിൽ തീരുമാനിച്ചു. തിരുവനന്തപുരം, കൊല്ലം ജില്ലകളുടെ യോഗം 22 ന് തിരുവനന്തപുരത്ത് നടക്കും. കോട്ടയം, ആലപ്പുഴ, പത്തനംതിട്ട, ഇടുക്കി മേഖലാ യോഗം 23 ന് കോട്ടയത്തും, എറണാകുളം, തൃശൂർ, പാലക്കാട് ജില്ലകളുടെ യോഗം 24 ന് ആലുവയിലും ചേരും. കോഴിക്കോട് 27 ന് നടക്കുന്ന യോഗത്തിൽ കോഴിക്കോട്, വയനാട് മലപ്പുറം, ജില്ലകളും, കണ്ണൂരിൽ 25 ന് നടക്കുന്ന യോഗത്തിൽ കണ്ണൂർ, കാസർകോട് ജില്ലകളും പങ്കെടുക്കും .
തിരുവനന്തപുരം, കോട്ടയം മേഖലാ റിപ്പോർട്ടിങ്ങിൽ സംസ്ഥാന സെക്രട്ടറി കാനം രാജേന്ദ്രനും, ആലുവയിൽ ദേശീയ സെക്രട്ടേറിയറ്റ് അംഗം ബിനോയ് വിശ്വവും, കോഴിക്കോട് ദേശീയ എക്സിക്യൂട്ടീവംഗം കെ പ്രകാശ്ബാബുവും കണ്ണൂരിൽ ദേശീയ എക്സിക്യൂട്ടീവംഗം പി സന്തോഷ് കുമാർ എം പിയും പങ്കെടുക്കും. തിരുവനന്തപുരം, കോട്ടയം, ആലുവ മേഖലാ യോഗങ്ങളിൽ പാർട്ടി ലോക്കൽ കമ്മിറ്റി സെക്രട്ടറിമാർ വരെയുള്ള ഘടകങ്ങളിലുള്ളവരും കോഴിക്കോട്, കണ്ണൂർ മേഖലാ യോഗങ്ങളിൽ ബ്രാഞ്ച് സെക്രട്ടറിമാർ വരെയുള്ളവരും പങ്കെടുക്കണമെന്ന് സംസ്ഥാന സെക്രട്ടറി കാനം രാജേന്ദ്രൻ അറിയിച്ചു.
