ന്യൂഡൽഹി: ഗുസ്തി താരങ്ങളുടെ പ്രതിഷേധത്തിന് പിന്തുണ പ്രഖ്യാപിച്ച് കര്‍ഷകര്‍ ജന്തര്‍ മന്തറില്‍. ഭാരതീയ കിസാന്‍ യൂണയിന്റെ നേതൃത്വത്തില്‍ പിന്തുണയുമായെത്തിയ കര്‍ഷകര്‍ പോലീസിന്റെ ബാരിക്കേഡുകള്‍ തകര്‍ത്ത് പ്രതിഷേധവേദിയിലെത്താന്‍ ശ്രമിച്ചു. പോലീസ് തടഞ്ഞെങ്കിലും സമാധാനപരമായി പ്രതിഷേധിക്കുമെന്ന ഉറപ്പിന്റെ അടിസ്ഥാനത്തില്‍ കര്‍ഷകരെ കടത്തിവിടുകയായിരുന്നു.
ഗുസ്തി താരങ്ങളെ പിന്തുണയ്ക്കുമെന്ന് സംയുക്ത കിസാന്‍ മോര്‍ച്ച മെയ് ആറിന് പ്രഖ്യാപിച്ചിരുന്നു. ഡല്‍ഹി പോലീസ് അര്‍ധരാത്രിയില്‍ ഗുസ്തി താരങ്ങളുടെ പ്രതിഷേധവേദിയിലെത്തി ഭീഷണിപ്പെടുത്തിയതിന് പിന്നാലെയായിരുന്നു ഇത്. ഗുസ്തി താരങ്ങളുടെ പ്രതിഷേധത്തിന് പൂര്‍ണ പിന്തുണ പ്രഖ്യാപിച്ച് അവര്‍ക്കൊപ്പമിരിക്കുമെന്നായിരുന്നു പ്രഖ്യാപനം.
