കാലടി: ഗവർണർ ചാൻസിലർ പദവിയടക്കം രാജി വെക്കണമെന്നാവശ്യപ്പെട്ട് കാലടി സംസ്‌കൃത സർവ്വകലാശാല എഐഎസ്എഫ് യൂണിറ്റ് പോസ്റ്റ് കാർഡ് സമരം സംഘടിപ്പിച്ചു. പരിപാടി എഐഎസ്എഫ് എറണാകുളം ജില്ലാ സെക്രട്ടറി എ എ സഹദ് ഉദ്ഘാടനം ചെയ്തു.
കേരളത്തിലെ സർവ്വകലാശാലകളിലെ 9 വൈസ് ചാൻസിലർമാരോടും രാജി ആവശ്യപ്പെട്ട ചാൻസിലർ ഫെഡറൽ സംവിധാനത്തെ വെല്ലുവിളിക്കുകയാണെന്നും അത്തരം പ്രവർത്തനങ്ങൾക്ക് ചുക്കാൻ പിടിക്കുന്ന ഗവർണറാണ് രാജി വെച്ചൊഴിയേണ്ടതെന്നും പരിപാടി ഉദ്ഘാടനം ചെയ്തുകൊണ്ട് അദ്ദേഹം പറഞ്ഞു.
ക്യാമ്പയിന്റെ ഭാഗമായി സർവ്വകലാശാലയിലെ വിദ്യാർത്ഥി – അധ്യാപക – അനധ്യാപകരിൽ നിന്നും അഞ്ഞൂറിലധികം കത്തുകളാണ് രാജി ആവശ്യപ്പെട്ട് ഗവർണർക്ക് അയച്ചത്. പരിപാടിയിൽ എഐഎസ്എഫ് അങ്കമാലി മണ്ഡലം സെക്രട്ടറി ശ്രീഹരി കെ പ്രസാദ്, എസ് റൈഫാൻ, ശ്രീദേവി മോഹൻദാസ്, വിനീത് എന്നിവർ സംസാരിച്ചു.
