പാരീസ്: ഫ്രഞ്ച് ലീഗ് വണ്ണില്‍ വിജയകുതിപ്പ് തുടര്‍ക്കഥയാക്കി നിലവിലെ ചാമ്പ്യന്മാരായ പിഎസ്ജി. അയാക്‌സിയോയെ എതിരില്ലാത്ത മൂന്ന് ഗോളുകള്‍ക്ക് തകര്‍ത്ത് പിഎസ്ജി വിജയമാഘോഷിച്ചു. ഒരു ഗോളടിക്കുകയും രണ്ട് ഗോളിന് വഴിയൊരുക്കുകയും ചെയ്ത സൂപ്പര്‍ താരം മെസിയാണ് പിഎസ്ജിയുടെ വിജയമൊരുക്കിയത്. കിലിയന്‍ എംബാപ്പെ രണ്ട് ഗോളടിച്ചു.
മത്സരത്തിന്റെ 24-ാം മിനിറ്റില്‍ എംബാപ്പെയിലൂടെ പിഎസ്ജി ലീഡെടുത്തു. മെസി നല്‍കിയ പാസ് എംബാപ്പെ അനായാസം വലയിലെത്തിച്ചു. രണ്ടാം പകുതിയില്‍ 78-ാം മിനിറ്റില്‍ മെസി ലക്ഷ്യം കണ്ടു. ബോക്‌സിനകത്തുവെച്ച് പന്ത് ലഭിച്ച മെസി ഗോള്‍കീപ്പറെ കബിളിപ്പിച്ച് പന്ത് വലയിലാക്കി.
മത്സരമവസാനിക്കാനിരിക്കെ 82-ാം മിനിറ്റില്‍ എംബാപ്പെ വീണ്ടും ലക്ഷ്യം കണ്ടു. ഇത്തവണയും മെസിയുടെ പാസിലൂടെയാണ് എംബാപ്പെ ഗോളടിച്ചത്. ഇതോടെ പിഎസ്ജി വിജയമുറപ്പിച്ചു. സ്റ്റാര്‍ സ്‌ട്രൈക്കര്‍ നെയ്മര്‍ ഇല്ലാതെയാണ് പിഎസ്ജി കളിക്കാനിറങ്ങിയത്.
ഈ വിജയത്തോടെ 12 മത്സരങ്ങളില്‍ നിന്ന് 10 വിജയമടക്കം 32 പോയന്റുമായി പിഎസ്ജി ഒന്നാം സ്ഥാനത്ത് തുടരുന്നു. സീസണില്‍ ഇതുവരെ പിഎസ്ജി തോല്‍വി അറിഞ്ഞിട്ടില്ല.
