ആലപ്പുഴ : പിറന്ന മണ്ണിൽ മനുഷ്യനായി ജീവിക്കാനുള്ള അവകാശ പോരാട്ടത്തിനിടെ സർ സിപിയുടെ ചേറ്റുപട്ടാളത്തിന്റെ വെടിയേറ്റ് മരിച്ച രക്തതാരകങ്ങൾക്ക് നാളെ നാട് പ്രണാമമർപ്പിക്കും .
പുന്നപ്ര വടക്ക്, തെക്ക് പഞ്ചായത്തുകളിലെ വിവിധ വാർഡുകളിൽ നിന്നും ചെറുജാഥകളായി ധീരദേശാഭിമാനി കൾ പിടഞ്ഞുവീണ പുന്നപ്രയിലെ സമരഭൂമിയിൽ രാവിലെ 11 ന് പുഷ്പാർച്ചന നടക്കും. ഇരുകമ്മ്യൂണിസ്റ്റ് പാർട്ടിയുടേയും നേതാക്കൾ ചടങ്ങിൽ പങ്കെടുക്കും തുടർന്ന് നടക്കുന്ന രക്തസാക്ഷി അനുസ്മരണ സമ്മേളനത്തിൽ സി വാമദേവ് അധ്യക്ഷത വഹിക്കും . സി ഷാംജി സ്വാഗതം പറയും . സിപിഐ ജില്ലാ സെക്രട്ടറി ടി ജെ ആഞ്ചലോസ് , സി പിഐ(എം) ജില്ലാ സെക്രട്ടറി ആർ നാസർ എന്നിവർ അനുസ്മരണ പ്രഭാഷണം നടത്തും. കെ എം ജുനൈദ് നന്ദി പറയും. തുടർന്ന് വിപ്ലവഗാന അവതരണം. പകൽ മൂന്ന് മണിക്ക് ദീപശിഖ റാലി ആരംഭിക്കും. പുന്നപ്ര രക്തസാക്ഷി മണ്ഡപത്തിൽ നിന്ന് സമരസേനാനി പി കെ വിജയന്റെ പത്നി എൽ സുലോചന ദീപശിഖ കൊളുത്തി അത്‌ലറ്റിന് കൈമാറും.
വിവിധ കേന്ദ്രങ്ങളിലൂടെ സ്വീകരണം ഏറ്റുവാങ്ങി വൈകിട്ട് 6 ന് പറവൂർ രക്തസാക്ഷി അനുസ്മരണ മണ്ഡപനടയിൽ റിലേ എത്തും. സമരസേനാനി എം പി കുമാരന്റെ ചെറുമകൻ ഇ ജെ അജിത്തിൽ നിന്നും വാരാചരണ കമ്മിറ്റി പ്രസിഡന്റ് ഇ കെ ജയൻ ദീപശിഖ ഏറ്റുവാങ്ങി രക്തസാക്ഷി മണ്ഡപനടയിൽ സ്ഥാപിക്കും. വിവിധ കലാസാഹിത്യ മത്സരങ്ങളുടെ വിജയികൾക്കുള്ള സമ്മാനദാനം പി ജി സൈറസ് നിർവഹിക്കും. പി കെ ബൈജു അധ്യക്ഷനാകും. ടി എസ് ജോസഫ് സ്വാഗതവും എം ഷീജ നന്ദിയും പറയും. അമ്പലപ്പുഴ തെക്ക്, വടക്ക്, പുറക്കാട് പഞ്ചായത്തുകളിലെ വിവിധ വാർഡുകളിൽ നിന്നുള്ള പുഷ്പാർച്ചന റാലി നാലിന് വണ്ടാനം ജംഗ്ഷനിൽ കേന്ദ്രീകരിച്ച് പുന്നപ്ര രക്തസാക്ഷി ബലീകുടീരത്തിൽ പുഷ്പാർച്ചന നടത്തും. വൈകിട്ട് 5.30 ന് സമരഭൂമിയിൽ നടക്കുന്ന പൊതുസമ്മേളനം സിപിഐ എം സംസ്ഥാന സെക്രട്ടറി എം വി ഗോവിന്ദൻ മാസ്റ്റർ ഉദ്ഘാടനം ചെയ്യും. സിപിഐ നേതാവ് മുല്ലക്കര രത്നാകരൻ, സജി ചെറിയാൻ എംഎൽഎ, ജി സുധാകരൻ, വി പി ഉണ്ണികൃഷ്ണൻ, ആർ നാസർ, ടി ജെ ആഞ്ചലോസ്, എച്ച് സലാം എംഎൽഎ, പി വി സത്യനേശൻ, വി മോഹൻദാസ് എന്നിവർ സംസാരിക്കും. ഇ കെ ജയൻ അധ്യക്ഷത വഹിക്കും. എ ഓമനക്കുട്ടൻ സ്വാഗതവും എം പി ഗുരുലാൽ നന്ദിയും പറയും. തുടർന്ന് ഇതിഹാസം നാടകം അരങ്ങേറും.
പുന്നപ്ര രക്തസാക്ഷികൾ അന്തിയു റങ്ങുന്ന ആലപ്പുഴ വലിയചുടുകാട്ടിൽ നാളെ വൈകിട്ട് 5 ന് പുഷ്പാർച്ചനയും അനുസ്മരണ സമ്മേളനവും നടക്കും. അനുസ്മരണ സമ്മേളനത്തിൽ വാരാ ചരണ കമ്മിറ്റി പ്രസിഡന്റ് പി പി ചിത്തരഞ്ജൻ എംഎൽഎ അധ്യക്ഷത വഹിക്കും. സെക്രട്ടറി ആർ സുരേഷ് സ്വാഗതം പറയും. സിപിഐ(എം) സംസ്ഥാന സെക്രട്ടറി എം വി ഗോവിന്ദൻ മാസ്റ്റർ, സിപിഐ ദേശീയ എക്സിക്യൂട്ടീവ് അംഗം കെ പ്രകാശ് ബാബു, ജി സുധാകരൻ, ടി ജെ ആഞ്ചലോസ്, ആർ നാസർ, സി ബി ചന്ദ്രബാബു, വി മോഹൻദാസ് എന്നിവർ പങ്കെടുക്കും.
സാംസ്കാരിക സമ്മേളനം ഇന്ന്
ആലപ്പുഴ: പുന്നപ്ര വയലാർ വാർഷിക വാരാചരണത്തിന്റെ ഭാഗമായി പുന്നപ്ര സമര ഭൂമിയിൽ ഇന്ന് വൈകിട്ട് 5:30 ന് നടക്കുന്ന സാംസ്കാരിക സമ്മേളനം കൃഷി മന്ത്രി പി പ്രസാദ് ഉദ്ഘാടനം ചെയ്യും . എച്ച് സലാം എം അധ്യക്ഷത വഹിക്കും . ചലച്ചിത്ര സംവിധായകൻ വിനയൻ , കുരീപ്പുഴ ശ്രീകുമാർ , വള്ളിക്കാവ് മോഹൻദാസ് , രാമപുരം ചന്ദ്രബാബു , പി കെ മേദിനി , അലിയാർ എം മാക്കിയിൽ , ചേർത്തല ജയൻ തുടങ്ങിയവർ പങ്കെടുക്കും . വി കെ ബൈജു സ്വാഗതവും കെ എഫ് ലാൽജി നന്ദിയും പറയും .
