രാജസ്ഥാനില്‍ വോട്ടെടുപ്പ് ആരംഭിച്ചു. 200 നിയമസഭാ സീറ്റിലെ 199 മണ്ഡലങ്ങളിലുള്ള വോട്ടെടുപ്പാണ് ഇന്ന് രാവിലെ ഏഴ് മണിക്ക് ആരംഭിച്ചത്. കോണ്‍ഗ്രസ് സ്ഥാനാര്‍ത്ഥിയായ ഗുര്‍മീത് സിങ് കോണോറിന്റെ മരണം മൂലം ഗംഗാനഗറിലെ കരണ്‍പൂര്‍ മണ്ഡലത്തില്‍ വോട്ടെടുപ്പ് ഉണ്ടാകില്ല.

183 വനിതകള്‍ ഉള്‍പ്പെടെ 1875 സ്ഥാനാര്‍ത്ഥികള്‍ മത്സരിക്കുന്ന രാജസ്ഥാനില്‍ 5,26,90,146 വോട്ടര്‍മാരാണുള്ളത്. 51,507 പോളിങ് സ്‌റ്റേഷനുകളാണ് രാജസ്ഥാനിലുള്ളത്. വോട്ടർപട്ടികയിൽ പുരുഷന്മാരാണ് കൂടുതലെങ്കിലും കഴിഞ്ഞ തവണ വോട്ടുചെയ്തവരിൽ കൂടുതൽ സ്ത്രീകളായിരുന്നു. 1875 സ്ഥാനാർഥികളാണ് ജനവിധി തേടുന്നത്. ഇതിൽ 183 പേർ മാത്രമാണ് സ്ത്രീകൾ. ഡിസംബര്‍ മൂന്നിന് തിരഞ്ഞെടുപ്പ് ഫലം പുറത്തുവരും. ഇന്ന് വൈകുന്നേരം ആറുമണി വരെയാണ് വോട്ടെടുപ്പിന്റ സമയം.