ബംഗളൂരു: നടനും സഹസംവിധായകനുമായ സിദ്ധാന്ത് കപൂർ മയക്കുമരുന്ന് കേസിൽ പിടിയിൽ. നടൻ ശക്തി കപൂറിന്റെ മകനും നടി ശ്രദ്ധാ കപൂറിന്റെ സഹോദരനുമാണ് സിദ്ധാന്ത് കപൂർ. ഞായറാഴ്ച ബംഗളൂരുവിലെ എം ജി റോഡിലെ പഞ്ചനക്ഷത്ര ഹോട്ടലിൽ നടത്തിയ റേവ് പാർട്ടിക്കിടെ പൊലീസ് നടത്തിയ പരിശോധനയിലാണ് സിദ്ധാന്ത് കപൂർ പിടിയിലായത്.
തുടർന്ന് റേവ് പാർട്ടിയിൽ പങ്കെടുത്ത 35 ഓളം ആളുകളെ മെഡിക്കൽ പരിശോധനയ്ക്ക് വിധേയമാക്കി. ഇതിൽ സിദ്ധാന്ത് കപൂർ അടക്കം അഞ്ചുപേരുടെ പരിശോധനാഫലം പോസിറ്റീവ് ആകുകയായിരുന്നുവെന്നാണ് പൊലീസിന്റെ കണ്ടെത്തൽ. സിദ്ധാന്ത് ലഹരിമരുന്ന് ഉപയോഗിച്ചതായി പരിശോധനയിൽ തെളിഞ്ഞെന്ന് ബംഗളൂരു സിറ്റി പൊലീസ് കമ്മീഷ്ണർ വ്യക്തമാക്കി. ഇവർ മയക്കുമരുന്ന് കഴിച്ച് പാർട്ടിക്ക് വന്നതാണോ അതോ ഹോട്ടലിൽ വെച്ചാണോ കഴിച്ചതെന്ന് വ്യക്തമല്ലെന്ന് പൊലീസ് പറഞ്ഞു.
