അനുചേദം 370 പുനഃസ്ഥാപിക്കണമെന്നാവശ്യപ്പെട്ട് പാസാക്കിയ പ്രമേയത്തിന്റെ പേരിൽ ജമ്മു കശ്മീർ നിയമസഭയിൽ വീണ്ടും കയ്യാങ്കളി. പ്രമേയത്തിനെതിരെ ബിജെപി അംഗങ്ങൾ പ്രതിഷേധിച്ചതോടെ വാക്കേറ്റവും ഉന്തുംതള്ളുമുണ്ടായി. സഭ തടസപ്പെട്ടു. പ്രമേയത്തിലൂടെ ഇന്ത്യ സഖ്യം ഭരണഘടനയെ അവഗണിച്ചു എന്ന് ബിജെപി നേതാവ് സ്മൃതി ഇറാനി പറഞ്ഞു.
ഉപമുഖ്യമന്ത്രി സുരീന്ദർ ചൗധരിയാണ് പ്രത്യേക പദവി പുനഃസ്ഥാപിക്കണമെന്നാവശ്യപ്പെട്ടുന്ന പ്രമേയം കഴിഞ്ഞ ദിവസം അവതരിപ്പിച്ചത്. നിയമസഭ പ്രമേയം പാസാക്കി. പ്രമേയം പിൻവലിക്കണമെന്ന് ആവശ്യപ്പെട്ട് പ്രതിപക്ഷനേതാവ് സുനിൽ ശർമയുടെ നേതൃത്വത്തിൽ ബിജെപി അംഗങ്ങൾ സഭയിൽ ബഹളമുയർത്തി. അതിനിടെ എഐപി എംഎൽഎ ഖുർഷിദ് അഹമ്മദ് ഷെയ്ഖ് അനുചേദം 370 പുനസ്ഥാപിക്കണം എന്ന് ആവശ്യപ്പെട്ടു സഭയിൽ ബാനർ ഉയർത്തിയതാണ് കയ്യാങ്കളിക്ക് ഇടയാക്കിയത്.
ബിജെപി അംഗങ്ങളും നാഷണൽ കോൺഫറൻസ് -പിഡിപി അംഗങ്ങളും തമ്മിൽ ഏറ്റുമുട്ടി. ഗാർഡുകൾ എത്തിയാണ് അംഗങ്ങളെ പിടിച്ചു മാറ്റിയത്. ജമ്മുകശ്മീരിൽ ഇന്ത്യ സഖ്യ സർക്കാർ പാസാക്കിയ പ്രമേയം ഭരണഘടനയ്ക്ക് എതിരാണെന്നും, പാർലമെന്റിനെ അവഹേളിച്ചു എന്നും ആരോപിച്ച് ബിജെപി നേതാവ് സ്മൃതി ഇറാനി രംഗത്ത് വന്നു. ജമ്മു കശ്മീരിന്റെ പ്രത്യേക പദവി പുനഃസ്ഥാപിക്കാൻ, തെരെഞ്ഞെടുക്കപ്പെട്ട സർക്കാരുമായി കേന്ദ്രസർക്കാർ ചർച്ചകൾ തുടങ്ങണമെന്നു ആവശ്യപ്പെടുന്നതാണ് നിയമ സഭ പാസാക്കിയ പ്രമേയം.
