ടി ടി ജിസ്മോൻ
എഐവൈഎഫ് സംസ്ഥാന സെക്രട്ടറി
ഇസ്ലാമികനിയമം അനുശാസിക്കുന്ന മതപരമോ ആത്മീയമോ സേവനപരമോ ആയ പ്രവർത്തനങ്ങൾക്കുവേണ്ടി ദാനം ചെയ്തിട്ടുള്ള സ്ഥാവരമോ ജംഗമമോ ആയ സ്വത്തിനെയാണ് വഖഫ് എന്ന് പറയുന്നത്. സ്വന്തം ഉടമസ്ഥതയിലുള്ള സ്വത്ത് മതപരമോ ജീവകാരുണ്യപരമോ ആയ ആവശ്യങ്ങൾക്ക് വേണ്ടി ദൈവപ്രീതി മാത്രം കാംക്ഷിച്ചു നൽകുന്ന ദാനമാണത്. ‘തടഞ്ഞു വയ്ക്കുക’, ‘വിലക്കുക’ അല്ലെങ്കില്‍ ‘നിര്‍ത്തുക’ എന്നര്‍ത്ഥം വരുന്ന അറബി പദത്തില്‍ നിന്നാണ് വഖഫ് എന്ന പദം ഉത്ഭവിച്ചിട്ടുള്ളത്. ‘മുറിഞ്ഞു പോകാതെ എന്നും നിലനിൽക്കുന്ന ദാനം’ (സ്വദഖതുൻ ജാരിയ) എന്നതാണ് ഇതിന്റെ ആശയം.
ഒരു മനുഷ്യന്റെ മരണത്തോടെ മൂന്ന് വഴികളിലൂടെയുള്ളതല്ലാത്ത പ്രവർത്തന ഫലങ്ങളെല്ലാം നിഷ്ഫലമായിപ്പോകുമെന്നും സ്ഥായിയായ ധർമവും ഉപകാരപ്രദമായ അറിവും അവനു വേണ്ടി പ്രാർഥിക്കുന്ന സദ്‌വൃത്തരായ സന്താനങ്ങളുമാണ് മരണാനന്തര ശേഷവും ഫലങ്ങൾ നൽകുന്ന ആ മൂന്ന് കാര്യങ്ങളെന്നും ഹദീസിൽ വായിക്കാൻ കഴിയുന്നുണ്ട്.
(മുസ്‌ലിം).
ഇവിടെ ഹദീസിൽ പറയുന്ന സ്ഥായിയായ ധർമം എന്നതിന്റെ വിവക്ഷ വഖഫാണെന്ന് ഇസ്ലാമിക പണ്ഡിതലോകം വ്യക്തമാക്കുന്നുണ്ട്. ഇസ്ലാമിലെ ആദ്യ വഖഫ് പിന്നീട് ഖലീഫയായ ഉമറിന്റേതായിരുന്നുവെന്നും കാണാൻ കഴിയുന്നുണ്ട്. ഖൈബർ യുദ്ധാനന്തരം പ്രവാചകനെ സമീപിച്ച് തനിക്ക് ലഭിച്ച ഗനീമത്ത് (യുദ്ധാര്‍ജ്ജിത സ്വത്ത്’ ) എന്ത് ചെയ്യണമെന്ന ഉപദേശം ആരാഞ്ഞ ഉമറിനോട് ‘താങ്കൾ ഉദ്ദേശിക്കുന്നുവെങ്കിൽ വസ്തു നിലനിർത്തിക്കൊണ്ട് തന്നെ ധർമം ചെയ്യാമല്ലോ ‘എന്നായിരുന്നു പ്രവാചകന്റെ മറുപടി. ഉടനെ ഉമർ ആ സ്ഥലം മുഴുവൻ വഖഫ് ചെയ്തതായി പ്രഖ്യാപിക്കുകയായിരുന്നു.
ശേഷം പ്രവാചകൻ പറഞ്ഞു: “ഈ ഭൂമി വിൽക്കാനോ ദാനം ചെയ്യാനോ അനന്തരമായി നൽകാനോ പാടില്ല. അതിൽ നിന്ന് ലഭിക്കുന്ന വരുമാനം ദരിദ്രർ, കുടുംബ ബന്ധുക്കൾ, മോചനം ആഗ്രഹിക്കുന്ന അടിമകൾ, യോദ്ധാക്കൾ, യാത്രക്കാർ, അതിഥികൾ എന്നിവർക്ക് നൽകണം “
(ബുഖാരി, മുസ്‌ലിം).
സ്വത്തിന്റെ ഉടമസ്ഥാവകാശം കൈവശമിരിക്കുന്ന വ്യക്തിയില്‍ നിന്ന് എടുത്തുമാറ്റപ്പെടുകയും ദൈവത്തിങ്കലേക്ക് കൈമാറ്റം ചെയ്യപ്പെടുകയും ചെയ്യുന്ന ഈ വ്യവസ്ഥ പ്രകാരം മതസ്ഥാപനങ്ങള്‍ക്കോ, പള്ളികള്‍ക്കോ, ശ്മശാനങ്ങള്‍ക്കോ, വിദ്യാഭ്യാസ സ്ഥാപനങ്ങള്‍ക്കോ, ജീവകാരുണ്യ ആവശ്യങ്ങള്‍ക്കോ വഖഫ് ആയി സംഭാവന നല്‍കാവുന്നതാണ്. ഒരിക്കല്‍ വഖഫ് ആയി നല്‍കിയ സ്വത്ത് ദൈവനാമത്തിൽ നൽകപ്പെടുന്നവയായതിനാൽ തിരിച്ചെടുക്കാനോ പിന്നീട് ഇത് പനഃപരിശോധിക്കാനോ അസാധുവാക്കാനോ സാധിക്കുന്നതല്ലെന്നതാണ് വസ്തുത.
വഖഫ് സ്വത്തുക്കളുമായി ബന്ധപ്പെട്ട ആദ്യനിയമനിർമ്മാണം ബ്രിട്ടീഷ് ഇന്ത്യയിൽ ഉണ്ടാകുന്നത് 1913ലാണ്. സ്വാതന്ത്ര്യാനന്തരം വഖഫ് നിയമം നിലവിൽ വരുന്നത് 1954 ലാണ്. 1964-ല്‍ സെന്‍ട്രല്‍ വഖഫ് കൗണ്‍സില്‍ ഓഫ് ഇന്ത്യ സ്ഥാപിക്കുകയുണ്ടായി. 1995ൽ പാ‍ർലമെന്റിനകത്തും പുറത്തുമുള്ള ഒട്ടനവധി ചർച്ചകൾക്കുശേഷം കൂടുതൽ മെച്ചപ്പെട്ട ഭരണനിർവ്വഹണം ലക്ഷ്യംവെച്ചുകൊണ്ട് പുതിയ വഖഫ് നിയമം പാസ്സാക്കുകയും 2013ൽ അതിന് ഭേദഗതിയുണ്ടാവുകയും ചെയ്തു.
എന്നാൽ രാജ്യത്തെ വഖഫ് സ്വത്തിന്റെ നിയന്ത്രണത്തിലും പരിപാലനത്തിലും വമ്പിച്ച മാറ്റങ്ങൾ നി‍ർദ്ദേശിക്കുന്ന 2024 ഓഗസ്റ്റ് 8 ൽ ബിജെപി സർക്കാർ ഇന്ത്യൻ പാർലമെന്റിൽ അവതരിപ്പിച്ച വഖഫ് ഭേദഗതി ബിൽ ഭരണ ഘടനയുടെ ഇരുപത്തി ആറാം (26)വകുപ്പ് പ്രകാരം വിവിധ മത വിഭാഗങ്ങൾക്ക് തങ്ങളുടെ സ്ഥാപനങ്ങൾ നിർമ്മിക്കാനും കൈകാര്യം ചെയ്യാനുമുറപ്പ് നൽകുന്ന മൗലികാവകാശങ്ങളുടെ നഗ്നമായ ലംഘനമാണെന്ന് കാണാൻ കഴിയും. കഴിഞ്ഞ അ‍ഞ്ചു വർഷമെങ്കിലും ഇസ്ലാം മതം പിന്തുടർന്നിരുന്ന ഒരാൾക്കു മാത്രമേ വഖഫ് പ്രഖ്യാപിക്കാനാകൂ എന്ന് ഭേദഗതിയിൽ പറയുമ്പോൾ അമുസ്ലീങ്ങളായ അനവധി വ്യക്തികൾ വഖഫായി ദാനം നൽകിയ സ്വത്തുക്കളും രാജ്യത്ത് ഉണ്ടെന്നുള്ള വസ്തുതയെ കണ്ടില്ലെന്ന് നടിക്കുകയാണ് കേന്ദ്രം.
1995ലെ നിയമത്തിലെ ‘വഖഫ് ബൈ യൂസ്’ എന്ന വ്യവസ്ഥ പുതിയ ഭേദഗതിയോടെ ഇല്ലാതാകും എന്നതാണ് മറ്റൊരു പ്രധാനപ്പെട്ട ആശങ്ക. നിലവിലെ വ്യവസ്ഥ പ്രകാരം വഖഫ് എന്ന് പരാമര്‍ശിക്കുന്ന രേഖ ഇല്ലാത്ത വസ്തുക്കളെയും വഖഫ് ആയി പരിഗണിച്ചിരുന്നു. യഥാര്‍ത്ഥ പ്രമാണം നിലവിൽ ലഭ്യമല്ലാത്തതോ, അല്ലെങ്കില്‍ കേടുപാടുകള്‍ സംഭവിച്ചതോ ആകാം എന്നതിനാലാണ് അപ്രകാരമുള്ള ഇളവ് ലഭിച്ചിരുന്നത്.
എന്നാൽ വഖഫ് എന്ന് കൃത്യമായി രേഖയുള്ളവയെ മാത്രം വഖഫായി പരിഗണിച്ച് ‘വഖഫ് ബൈ യൂസ്’ ആയി കണക്കാക്കിയിട്ടുള്ള സ്വത്തുക്കളെല്ലാം കണ്ടുകെട്ടുന്നത്തിനുള്ള അപകടകരമായ നീക്കം ഇവിടെ ഒളിഞ്ഞു കിടപ്പുണ്ട്. അതുപോലെ, നിയമപരമായുള്ള അനന്തരവകാശികൾക്കെല്ലാമുള്ള സ്വത്തുക്കൾ നീക്കി വെച്ച ശേഷം മാത്രമേ ഒരാൾ വഖഫിനായി സ്വത്തു മാറ്റിവെക്കാവൂ എന്ന് പുതിയ ഭേദഗതിയിൽ അനുശാസിക്കുമ്പോൾ ഉപയോഗം കൊണ്ട് കാലങ്ങളായി വഖഫ് ആയി പരിപാലിച്ച വസ്തുക്കളെ അങ്ങനെ തന്നെ നാളിതുവരെയുള്ള നിയമങ്ങളിൽ കണക്കാക്കിയിരുന്നതിനെയാണ് റദ്ദ് ചെയ്യുന്നത്.
നിലവില്‍ ഭൂരിപക്ഷം വഖഫ് ബോര്‍ഡ് അംഗങ്ങളും തെരഞ്ഞെടുക്കപ്പെട്ടവരാണെന്നിരിക്കെ പുതിയ ബില്‍ നിയമമാകുന്നതോടെ എല്ലാ അംഗങ്ങളെയും സര്‍ക്കാരിന് നോമിനേറ്റ് ചെയ്യാൻ കഴിഞ്ഞേക്കും. ഈ വ്യവസ്ഥ ഭരണത്തിലിരിക്കുന്നവര്‍ക്ക് ബോര്‍ഡില്‍ പൂര്‍ണ നിയന്ത്രണം ഉറപ്പാക്കുമെന്ന ആശങ്ക മുസ്ലീം സംഘടനകള്‍ക്കിടയിലുണ്ട്. തന്നെയുമല്ല ഒരു വസ്തുവക അല്ലെങ്കിൽ സ്വത്ത് വഖഫാണോ അല്ലയോ എന്ന് തീർച്ചപ്പെടുത്താനുള്ള അധികാരം നിലവിൽ വഖഫ് ബോർഡിനായിരുന്നുവെങ്കിൽ ഭേദഗതി പ്രകാരം വസ്തുവിന്റെ സര്‍വേ ഉത്തരവാദിത്തം ജില്ലാ കലക്ടര്‍മാരിൽ നിക്ഷിപ്തമാവുകയാണ് ചെയ്യുന്നത്.
അതുപോലെ വഖഫ് സ്വത്തുക്കളുടെ സർവ്വേയ്ക്ക് സർവ്വേ കമ്മീഷണർമാരെയും അഡീഷണൽ കമ്മീഷണർമാരെയും നിയമിക്കണമെന്ന് നിയമത്തിൽ പറഞ്ഞിരിക്കുമ്പോൾ ഭേദഗതിയിൽ ഇത് ഒഴിവാക്കുകയാണ്. പകരം സർവ്വേ നടത്താനുള്ള അധികാരവും കളക്ടർമാർക്ക് നൽകാനാണ് നിർദ്ദേശം. പുതിയ ബില്‍ പ്രകാരം മുസ്ലീം അല്ലാത്തവർക്ക് പോലും സിഇഒ ആകാൻ കഴിയും. കുറഞ്ഞത് രണ്ട് അംഗങ്ങളെങ്കിലും മുസ്ലീം അല്ലാത്തവരായിരിക്കണമെന്നും വ്യവസ്ഥ ചെയ്യുന്നുണ്ട്. മതത്തിന്റെ അടിസ്ഥാനത്തിൽ മാത്രം നില കൊള്ളുന്ന ഒരു സംവിധാനത്തിലേക്കാണ് മതത്തിന്റെ അടിസ്ഥാനകാര്യങ്ങളിൽ പോലും ഗ്രാഹ്യം ഉണ്ടാകാൻ സാധ്യതയില്ലാത്തവരെ നിയമിക്കാൻ വ്യഗ്രത കാണിക്കുന്നത്.
കേന്ദ്ര വഖഫ് കൗൺസിലിന്റെയും സംസ്ഥാന വഖഫ് ബോർഡുകളുടെയും ഘടനയിലും ഇപ്രകാരം രാജ്യത്തിന്റെ ഭരണഘടനക്കും മതനിരപേക്ഷതയ്ക്കും വിരുദ്ധമായ ഭേദഗതിയാണ് കേന്ദ്രം നിർദേശിക്കുന്നത്. കേന്ദ്ര വഖഫ് കാര്യ മന്ത്രി ചെയർമാനായ കൗൺസിലിൽ നിലവിലെ നിയമപ്രകാരം അംഗങ്ങളെല്ലാവരും മുസ്ലീംകളും അതിൽ രണ്ടുപേർ വനിതകളുമായിരിക്കണം എന്നതാണ് വ്യവസ്ഥ. എന്നാൽ പുതിയ ബിൽ പ്രകാരം രണ്ട് അമുസ്ലിം അംഗങ്ങളും മുസ്ലീം അംഗങ്ങളിലെ രണ്ടുപേർ വനിതകളാകണമെന്നും വ്യവസ്ഥ ചെയ്യുന്നു. സംസ്ഥാന വഖഫ് ബോർഡുകളിൽ നിലവിലെ നിയമമനുസരിച്ച്, മുസ്ലീം എംപിമാരിൽ നിന്നും എംഎൽഎമാരിൽ നിന്നും ബാർ കൗൺസിൽ അംഗങ്ങളിൽ നിന്നും തിരഞ്ഞെടുക്കപ്പെട്ട രണ്ട് അംഗങ്ങളാണെങ്കിൽ ഭേദഗതി ബില്ലിൽ തിരഞ്ഞെടുപ്പിനു പകരം ഇത് ഈ വിഭാഗങ്ങളിൽനിന്നുള്ള സംസ്ഥാന സർക്കാരിന്റെ നാമനിർദ്ദേശമായി മാറുകയാണ്.
അവർ മുസ്ലീംകളോ അമുസ്ലിംകളോ ആകാം. അതോടൊപ്പം ബോർഡിൽ രണ്ട് മുസ്ലീങ്ങളല്ലാത്ത അംഗങ്ങൾ വേണമെന്നും ബിൽ നിർദ്ദേശിക്കുന്നുണ്ട്. വഖഫ് സ്വത്തുക്കളെ സംബന്ധിച്ച തർക്കങ്ങളുണ്ടായാൽ അത് പരിഹരിക്കുന്നതിനായി നിലവിലെ നിയമമനുസരിച്ച് സംസ്ഥാനങ്ങൾ രൂപീകരിക്കുന്ന ട്രൈബ്യൂണലുകളിലെ ഒരംഗം ഇസ്ലാമിക നിയമങ്ങളിൽ അവഗാഹമുള്ള വ്യക്തിയായിരിക്കണമെന്ന വ്യവസ്ഥയെയും ഭേദഗതിയിൽ അപ്രസക്തമാക്കിയിരിക്കുകയാണ്. തന്നെയുമല്ല നിലവിൽ ട്രൈബ്യൂണൽ ഉത്തരവുകളെ അന്തിമമായി കണക്കാക്കുമ്പോൾ, ഭേദഗതിയിൽ ഈ വ്യവസ്ഥയെ നീക്കം ചെയ്ത് കൊണ്ട് ഹൈക്കോടതിയിൽ അപ്പീൽ കൊടുക്കാനുള്ള അവസരം നൽകുകയാണ് ചെയ്യുന്നത്.
ഇസ്ലാം മത നിയമ പ്രകാരം വഖഫ് ആയിക്കണ്ട് ഉപയോഗിച്ചു വരുന്ന വസ്തുക്കളെ സംബന്ധിച്ച അന്തിമ തീരുമാനങ്ങളിൽ വഖഫ് ബോർഡിനെ നോക്കു കുത്തിയാക്കുക വഴി ഇന്ത്യൻ ഭരണഘടനയുടെ അടിസ്ഥാന കാഴ്ചപ്പാടുകളെയാണ് മോദി സർക്കാർ കുഴിച്ചുമൂടുന്നത്. ഏത് മത വിഭാഗത്തിന്റെ മത എൻഡോവ്മെന്റ് നിയമങ്ങൾ ഭേദഗതി ചെയ്യാനൊരുങ്ങുമ്പോഴും സമുദായ നേതൃത്വങ്ങളുമായി കൂടിയാലോചന നടത്തിയും അവരെവിശ്വാസത്തിലെടുത്തുകൊണ്ടും ആയിരിക്കണമെന്ന സാമാന്യ തത്വത്തെ പോലും വഖഫ് വിഷയത്തിൽ കേന്ദ്ര സർക്കാർ കാറ്റിൽ പറത്തിയിരിക്കുകയാണ്.
അമുസ്ലിംകളുടെ ദാനത്തിന് നിരോധനം ഏർപെടുത്തുകയും എന്നാൽ വഖഫ് ഭരണത്തിൽ അവർക്ക് പങ്കാളിത്തം അനുവദിക്കുകയും ചെയ്യുന്നതിലൂടെ സംഘ് പരിവാർ വിധേയത്വമുള്ളവരെ ബോർഡുകളിൽ പ്രതിഷ്ഠിച്ച് നൂറ്റാണ്ടുകളായി വഖഫ് സ്വത്തായി ഉപയോഗിച്ചുവന്ന വസ്തുവകകൾപോലും ഭേദഗതിയുടെ മറവിൽ പിടിച്ചെടുക്കാനുള്ള ഭരണ കൂടത്തിന്റെ ഹിഡൻ അജണ്ട തന്നെ യാണ് ഇവിടെ മറ നീക്കി പുറത്തു വരുന്നത്. ഒരു മതവിഭാഗത്തിന്റെ വിശ്വാസപ്രമാണമനുസരിച്ചുള്ള സ്വത്തുക്കളുടെ പരിപാലനത്തിൽ അന്യമതസ്ഥരെ ഉൾപ്പെടുത്താനുള്ള വ്യഗ്രത ഇന്ന് വഖഫ് വിഷയത്തിലാണെങ്കിൽ നാളെ അത് ക്രൈസ്തവ സഭകളുടെ സ്ഥാപനങ്ങളിലേക്കും സിക്ക് സമുദായത്തിന്റെ ഗുരുദ്വാര നടത്തിപ്പിലേക്കുമടക്കം വ്യാപിപ്പിക്കാനുള്ള മുന്നൊരുക്കത്തിന്റെ ഭാഗമായി കണ്ടു കൊണ്ടുള്ള ജാഗ്രതയും ഇട പെടലുകളുമാണ് ഇവിടെ അനിവാര്യം.
അയോധ്യ പ്രശ്‌നപരിഹാരത്തിനായി തീരുമാനമെടുക്കുന്ന ഘട്ടത്തിൽ താൻ ദൈവത്തോട് പ്രാർത്ഥിച്ചിരുന്നുവെന്നും മൂന്നുമാസത്തോളം പരിഗണനയിലുണ്ടായിരുന്ന കേസിൽ തീരുമാനത്തിലെത്താൻ കഴിയാത്ത സാഹചര്യത്തിൽ വിഗ്രഹത്തിനുമുമ്പിൽ ഇരുന്ന് കേസ് തീർപ്പാക്കിത്തരണമെന്ന് അപേക്ഷിച്ചു വെന്നുമുള്ള മുൻ ചീഫ് ജസ്റ്റിസിന്റെ പ്രഖ്യാപനം ഓർക്കുന്നുണ്ടാകും. സംഘ് പരിവാർ ഭരണത്തിൽ നമ്മുടെ രാജ്യത്തെ നീതിന്യായ സംവിധാനത്തിന്റെ പോലും നിഷ്പക്ഷത ചോദ്യം ചെയ്യപ്പെടുകയാണ്. ചില അഭിപ്രായ വ്യത്യാസങ്ങളും തർക്കങ്ങളും സമ വായത്തിലൂടെയും വിവേകത്തോടെയും പരിഹരിക്കപ്പെടേണ്ടത് തന്നെയാണ്. എന്നാൽ മുട്ടനാടുകളെ തമ്മിലടിപ്പിച്ച് ചോര കുടിക്കാൻ വെമ്പൽ കൊള്ളുന്ന കുറുക്കന്റെ കൗശലത്തിൽ ആരും വീണു പോകരുത്.
